بمناسبة القربانة الأولى لإبن أخي بول دومنيك جوزاف بعيني ـ 25 اب 2019
ـ1ـ
يا بّول البعيني.. يا عينيي
بهنيك وبهنّي إبن خيي
قبلت المسيح اليوم بالقربان
وعرفت شو معنى المسيحيه
ـ2ـ
ببيت القداسه ربّتك "لوران"
الأم الـ بقلبا نبع حنيّه
"لوران" كلاّ تضحيه وإيمان
علّواه لو متلا خلق ميّه
ـ3ـ
و"دوم" بيّك بالتقى مليان
متل خوري وحامل شبيّه
يا "بول" بيّك زينة الشبّان
بْعِدّو أنا شيخ "البعينيه"
ـ4ـ
وجدّين مع ستّين من لبنان
أولاد أرزتنا السماويّه
عيال عم بيباركا الديّان
من حصرونيّه ومجدلاويّه
ـ5ـ
وخيّك "باتريك" أجمل الإخوان
حبّو.. تا حبّك قد ما فيي
فرانسين حدّو مزيّنه الأكوان
وإنتو التلاته من السما هديّه
ـ6ـ
وعمك أنا.. ختيرت بالهجران
وقلبك حنون.. تطلّع عليي
**
