يوم زارنا مختار مجدليا الدائم الياس ابي خطار والآنسة فابيولا "فوفو" أنيسة
ـ1ـ
المختار وفوفو عنّا
تهنّا يا قلب تهنّا
جايين.. وجابوا لبنان
حتى نلاقي موطنّا
المختار بعدّو انسان
ما بعمرو بيطلع منّا
وفوفو زهره بالبستان
ألله زيّنها بالنور
حتى بنورا تزيّنا
ـ2ـ
يا فابيولا.. غبنا سنين
وبعدا الجيره بتجمعنا
دكانة ستي خرستين
انتقلت ع الغربه معنا
المختار بصوتو تلاحين
فرحت فيها مْسامعنا
وإنتي سوسحتي بساتين
محبتكن يا أحلى تنين
فوق الكل بترفعنا
ـ3ـ
يا أهلا بجيران العمر
بأجمل طله مهيوبه
متل الاخوه عشنا دهر
ضحكتكن شو محبوبه
بجيرتكن ما دقت القهر
ولولا الدنيي مقلوبه
كنتو الزهر.. وكنتو العطر
وأحلى أْسامي مكتوبه
بقيتو أهلي بأرض الهجر
بقيتو الفرحه.. بقيتو الفخر
متل الرايه المنصوبه
ـ3ـ
وهالجمعيه الـ جمعتنا
ريّسها طوني المحبوب
قدرت تمحي غربتنا
وتمشينا أحلى دروب
فيها كبرت عيلتنا
وما بتتزعزع وحدتنا
بجاه العدرا والمصلوب
**
